Ме пагалыме лудшына-влак дек йӧн лекме семын эреак вашкена. Кодшо кугарнян «Морко мланде», «Кугарня» газет редакций-влакын пашаеҥышт дене пырля Морко район Арын селаште «Ӱжаран кастене» вашлиймашым эртаренна. Игече шокшо лийын гынат, пайремышке изижат-кугужат вашкен. Ме газетын эртыме корныжо, кызытсе пашаже, марий йылмын кӱлешлыкше нерген чон почын мутланенна. Мурызо-влак Геннадий Григорьев, Валентина Булыгина калыкым сылне марий мурышт дене куандареныт. Вашлиймашке Николай ача да черке пелен хорын еҥже-шамыч ушненыт. Куштылго атлетике дене Российын спорт мастерже Алина Прокопьева Арын кундемыште шочмыж дене кугешнен ойлен. Сылнымутым йӧратыше Владимир Александров шке почеламутшым лудын.
Арын кундемыште марий йӱлам, тӱвырам, шочмо йылмым жаплыше калык ила. Уста еҥ-влакат ятыр улыт. Нунын коклаште – «Ямде лий» газетын 1991-1997 ийласе тӱҥ редакторжо В.Крылов. Тудо Арын школышто тунемын. Шулдыр Васлийын корныжым тӱҥалтыш класслам туныктышо О.В.Алексееван вуйлатымыж почеш тунемше-шамыч шуят. Кумло наре йоча газетым альтернативный йӧн дене налеш. Сылнымут пашаштымат чӱчкыдын савыктена. Пайремыште, Олимпиада Васильевналан тауштен, изирак пӧлекым кучыктенна.
«Ӱжаран кастене» вашлиймаште икте-весе дене кутыраш, батутышто тӧрштылаш, тамле сийым кочкаш чыла йӧн лийын. Садлан пошкудо ялла гычат йоча-влак ятырын толыныт. Нуно «Ямде лий» газет дене палыме лийыныт да кылым кучаш сӧреныт. Викторинысе йодыш-шамычлан чын вашештен, чапле пӧлекым сеҥен налыныт.
