Яллаште илыше пырыс ден пий-влакланат озашт кевытыште налме, нунылан лӱмын ямдылыме сийым пукшат. Тыгай кочкыш ныл йолан йолташна-шамычын тазалыкыштым пеҥгыдемда але, мӧҥгешла, аярта? Тиде да моло йодышлан вашмутым Марий Эл Республикысе вольык, янлык чер ваштареш кучедалме шотышто станцийын вӱдышӧ ветеринар врачше Т.И.Кудрявцева пуа.
– Татьяна Ивановна, тыгай кочкыш пырыс ден пийлан эҥгекым ышта мо?
– Налме кочкыш пайдале витамин ден микроэлементлан поян. Но кажныже огыл. Садлан мо гыч, кунам ыштымым тӱткын лудман. Пакетысе кочкышым налаш тыршыман.
– Налме кочкыш мо гыч ышталтше лийшаш?
– Белковый янлык компонент 30-40 процент деч шагалрак, глютен 5-8 процент, янлык коя 15-18 процент деч шукырак лийшаш огытыл. Омега-6, тӱрлӧ консервант, ароматизатор, антиоксидант тазалыклан эҥгекым ыштат.
– Шӱр, шыл, шӧр дене пырля кевытысе кочкышым пукшаш лиеш?
– Налме кукшо кочкыш тугакат витаминлан поян. Садлан вес сий дене варыме годым аллергий лийын кертеш. Нуно пагарыште тӱрлӧ семын шулат. Кевытыште налме тӱрлӧ кочкышымат пырля вараш ок лий. Ик кочкыш гыч весыш кусарынеда гын, ик-кок арня жапыште эркын-эркын кусныман.
– Ныл йолан йолташ-влак мӧҥгысӧ кочкышым ынешт коч гын, кузе «ондалаш» лиеш?
– Виеш пукшыман огыл. Мӧҥгысӧ кочкыш капкыллан эҥгекым ыштен кертеш. Мутлан, пунышт йогаш тӱҥалеш. Шӧрат кажне пырыслан пайдале огыл. Южын организмже – шӧр белок ваштареш. Шӧр олмеш торыкым, кӱчымдорыкым, шолтымдорыкым темлаш лиеш. Ныл йолан йолташдан тазалыкше верч тургыжланеда гын, чыла тидым шотыш налман.
