«Артек» тӱнямбал йоча рӱдерыште канаш да шинчымашым налаш эре шоненам. Тушко кажне икшыве ок логал, тидлан кыртмен тунемман, тӱрлӧ конкурсышто сеҥышыш лекман манын, авам раш умылтарен. Мый сеҥымашке кажне кечын гаяк лӱдде ошкылынам. Шонымашем шукталтын. Шукерте огыл «Кипарисный» йоча лагерь гыч пӧртылынам (снимкыште). Ме ийгот дене эн изи лийынна гынат, чолгалыкнам чыла вере ончыктенна. «Юнги» отрядыштына вожатый-влак пеш поро кумылан, умылышо лийыныт. Тӱрлӧ вере экскурсий дене коштынна. Севастополь олашке, Аю-Даг да Куш-Кая курыклашке, «Суук-Су» полатышке миенна. Семафор азбуко дене палыме лийынна, теҥыз пышкемым кылдаш тунемынна. Шуко мероприятий ден конкурсышто мастарлыкнам ончыктенна. «Теҥыз кредалмаште» сеҥышыш лектынна. Мыланна диплом ден медальым кучыктеныт.
«Артек» – ик эн мотор да чапле рӱдер. Ты верыште лияш да сылнылыкшым шке ужаш – кугу пиал. Йолташ-влак, пӱжвӱдым йоктарен тыршеда гын, теат тушко логалын кертыда. Шарныза: шонымаш шукталтеш.
Полина АЛЕКСЕЕВА.
Морко, Коркатово.
«Артекыште» каненам
