Коча-ковалан – янлык пӧрт
Тора ялыште регенчалташ тӱҥалше ик пӧртыштӧ Миклай коча ден Оксина кова иленыт. Суртыштым Пикш пий оролен. Икана моткоч тале мардеж тарванен да пӧртге, кочаге-коваге, пийге торашке-торашке пуэн наҥгаен. Тыге нуно чодырашке «чоҥештеныт». Волен шичмеке, пӧртышт сӱмырлен. Пикшышт йӧршын йомын. Миклай ден Оксина ойгыреныт, шортыныт. Вара илашышт верым кычалын каеныт. Ошкеден-ошкеден, Маскам вашлийыныт:
– Родем-влак, кушко каеда? – йодын Торешчапа.
– Илашна пӧрт кӱлеш. Шкенан оралтына сӱмырлен. Ала тый полшен кертат? Ала тыйын яра пӧртет уло? – коча сӧрвален.
– Яра пӧртем уке. Мый декем илаш пурыза. Вер сита. Ваш-ваш полшена, икте-весылан эҥертена, – темлен Маска.
– Келшена, – йывыртеныт Миклай ден Оксина.
– Те мыланем пакчасаскам ончен кушташ полшеда?
– Полшена, полшена.
– А ме тыланда янлык-влак дене пырля у пӧртым чоҥен пуэна. Келшеда?
– Келшена, келшена! Пеш келшена, – куан шинчавӱд дене вашештеныт коча ден кова.
Миклай ден Оксина Маскан йыраҥлажым шӱкшудо деч сомыленыт, пушкыдемденыт, кажне кечын вӱдым шавеныт. Лӧза деч лӧза пакчасаскам ончен куштеныт. А Маска сӧрымыжым шуктен. Пире, Рывыж, Ур, Шоҥшо да воктен верланыше пӱя гыч Умдыр чапле пу пӧртым чоҥен шогалтеныт. Ик кечын Пикш кудал толын. Коча ден кова, Пикш эше ятыр-ятыр ий янлык-влак дене келшен да вашла полшен иленыт.
Костя ШЕХУРДИН.
Шернур, Кукнур.