Татарстан Республик Кукмара районысо Уял школышто марий шӱлышан ӱдыр-рвезе-влак тунемыт. Чолга тунемше-шамыч кокла гыч иктыже – 9-ше классым тунем пытарыше Яна Ишимова.
Яна изинек марий йылмылан, тӱвыралан кумылан кушкеш. Конкурсышко, олимпиадышке, конференцийышке ушнен, сеҥышыш лектеш. Ӱмаште марий йылме да литератур дене республикысе олимпиадыште уш-акылжым терген, сеҥыше-влак радамыш лектын. Шымлыме пашам эртара. «Нет забытых деревень» проектыште шочмо районысо ялла нерген кумдан палдарен. «Сопоставление марийских и татарских слов» проектыште марий да татар шомак-влакым таҥастарен, ойыртем ден икгайлыкым кычалын. «Народные праздники мари Кукморского района» пашам серен. Чыла вереат сай лектыш дене куандарен. Нине сеҥымашыже-влаклан ӱдыр марий йылмым да литературым туныктышо И.В.Родыгиналан таушта.
– Ешыштына чыланат марла мутланена. Школышто шочмо йылмым келгын тунемына. Наташа акам марий йылмым да литературым туныктышылан тунем лектын. Тудын дене моткоч кугешнем. Ончыкыжым медицине корным ойыраш шонем гынат, марий йылме чоныштем курымешлан лиеш, – ойла Яна.
Уялын чолга ӱдыржӧ
