Ик сылне кеҥеж кечын авам дене поҥгым погаш мийышна. Чодыра мучко коштна, пӱртӱсын моторлыкшым кугешнен ончышна. Кенета ончылнына изи шоҥшо койылалтыш.
– Авай, чодыра мыланна пӧлекым ышта. Тудым айда мӧҥгӧ наҥгаена, – сӧрвалышыла йодым.
Авам кӧныш. Шочмо суртыш миен шумеке, картон яшлыкыш илаш пуртышым. Чу, тудат чонан, кочмыжо шуэш вет! Йолташемлан талиҥгаш шӧ-рым темен пуышым. Тӱрлӧ сомылым шуктымо кокла гыч ончалаш шонен пыштышым. ӧрмаш! Ала-могай татыште Олач пырысна дене йолташ лийын шуктеныт. Шке семынышт ала-мом вудыматат. Йӧра, кутырышт, шке семынем шоналтышым.
Ик кечын шоҥшо шӱлыкаҥшыла койо. Чӱчкыдын шортын шинчымыжым шекланаш тӱҥальым.
– Шоҥшылан шочмо верже шергырак, очыни. Тудым эрыкыш колтыман, – темлыш авам.
Йолташемым чодыраш йӧршын колтымо ок шу ыле гынат, мыят чаманышым.
Икмыняр кече гыч Олач пырысна йомо. Ял мучко кычальым, пасушкат мийышым, пошкудо дечат йодым. Нигушто уке. Олачем садак толеш манын, кажне эрдене кугу ӱшан дене помыжалтым. Эре вучышым. Телат шуо, а ныл йолан йолташна ыш тол.
Лум шулаш тӱҥалмеке, авам дене угыч чодыраш тарванышна.
– Ола-а-а-ач! – чорикын кычкыральым.
Йӱкым ок пу.
– Ола-а-а-аче-е-ем! – авамат ушныш.
Тораштырак «Мо?» манме гае веле шоктыш. Тиде Олачна! «Мяу-мяу» манеш улмаш. Мемнам ужын кудал тольо да корно дене почешыже каяш кӱштыш. Миен шуна гын, шинчам пашкартышна. Шоҥшо дене коктын тыгай чапле изирак полатым чоҥеныт! Нуно вашла полшен илат улмаш. Тек ӱмыр мучкышт келшат, а ме нунын дек унала кошташ тӱҥалына. Шоҥшо ден Олачат мемнан дек мияш сӧрышт.
Устинья БОГДАНОВА.
Кужэҥер, Топкавлак.
