Увер-выр-вр

Козьмодемьянск оласе «Паллада» клубын юнгыжо-шамыч Кострома олаште эртаралтше Самырык моряк-влакын регион-влак кокласе слётыштышт лийыныт. «Патриотическая песня» конкурсышто, 500 метрыш куржмаште да снарядым кышкымаште икымше верыш лектыныт.

Telegram-каналыште марий актёр, поэт Йыван Кырлалан пӧлеклалтше стикерым луктыныт. Тушто марла 20 фразе уло. Мутлан, «Кугу тау!», «Салам лийже» да моло.

6 августышто Йошкар-Оласе Патриарший площадьыште калык кочкыш фестиваль эртаралтеш. Тушто тӱрлӧ калык шке кочкышыж дене палдараш тӱҥалеш. Мероприятийышке 60 тӱжем наре уна толшаш.

8-11-ше класслаште тунемше да информатикым йӧратыше-влаклан программирований дене кокияш курсым онлайн эрташ йӧн пуалтеш. Ӱдыр-рвезе-влак 4 модулян 36 шагаташ программым яра тунемаш тӱҥалыт.

17-36 ияш самырык еҥ-влакым «Наше поколение» конкурсышко ушнаш ӱжыт. Шочмо йылме дене почеламутым але ойлымашым возыман да  адрес дене электрон почтыш 31 август марте колтыман. Сылнымут паша-шамычым сборникеш савыктат.