Самырык еҥ лӱддымӧ, чолга гын, тудын илышыжат шолеш, шке усталыкшым тӱрлӧ вере терга. Теве Карина Григорьева Морко посёлкысо 2-шо номеран школышто индешымше классыште тунемеш. Тудо могай гына конкурсыш, мероприятийыш ушнен огыл! Эшежым Карина волонтёр да марий улмыж дене кугешна.
– Ешыште ме чылан марла мутланена, – ойла Карина. – Мыйын шонымаште, икшывым изинек шочмо йылмылан кумылаҥдыман. Мый йоча годсек марий мероприятийлаш, конкурслаш ушнаш йӧратем. Йочасадыш коштмем годым «Пеледше тукым» районысо конкурсышто усталыкемым ончыктенам да «Коваем» муро дене икымше верым сеҥен налынам. «Моркын изи миссше» таҥасымаште йочасадемын чапшым араленам.
Карина почеламутым сылнын лудмаш конкурслашке эре гаяк ушна. Школышто музыкым туныктышо Л.Н.Алексеева мурсемлан кумылаҥден. Классын, школын чапшым таҥасымашлаште арала.
– Карина, волонтёр пашаш ушнаш мо кумылаҥден?
– Вес еҥлан кеч изишак полшен кертшаш ыле манын, волонтёр пашаш ушненам. Добровольчество рӱдерыш коштам. Пырля тунемме ӱдыр-влак дене тӱрлӧ проектым илышыш шыҥдарена.
– Тӱҥ эҥертышетлан, наставникетлан кӧм шотлет?
– Тӱҥ эҥертышем – мыйын авам Е.В.Григорьева. Тудо чыла шотыштат полша. Тунеммаште нелылык лектеш гын, полыш кидым ковам шуялта. Класс вуйлатышем-влак Л.С.Логинова ден Э.А.Семёновам наставникем-шамыч семын ужам. Нуно мыйым шинчымаш корно дене вӱдат да чолга лияш туныктат.
