Эмиль Куклин (снимкыште) Кужэҥер районысо Кугу Лаждӱр ялеш шочын-кушкын. Шымше класс марте Йӱледӱр кыдалаш школышто тунемын. Тиде жапыште школын чапшым районысо таҥасымашлаште ятыр гана арален. Тудо школ пеленысе «Ястреб» спорт кружокыш коштын. Кызыт Эмиль Советский районысо Ургаш лицей-интернатыште 11-ше классыште тунемеш.
Рвезым спортлан ачаж ден изаже шӱмаҥденыт. Спортын тӱрлӧ видше дене кылым куча. Футболла модаш поснак келша. Кужэҥер районысо Йӱледӱр селан «Искра» да Йошкар-Оласе «Динамо» командылаште модеш. Тудо виян да чолга футболист.
– Мый изиэм годсек военный лияш шонем. А военный таза капкылан, пеҥгыде, патыр лийшаш манын, лишыл еҥем-влак эреак ойленыт. Шомакыштым ушышкем пыштенам да йоча годсек спорт дене пеҥгыде кылым кучем, – ойла Эмиль.
Фотом еш архив гыч налме.
