Школлаште марий йылмым туныктышо-влак йочашт годым шукынжо «Ямде лий» газет дене пеҥгыде кылым кученыт. Кызыт шкешт у юнкор-шамычым куштат. Нунын кокла гыч иктыже – Волжский район Памар школышто марий йылмым да ИКН-ым туныктышо Н.И.Яковлева (снимкыште).
Чолга изи ӱдыр Наталья Филиппова Сотнур школышто тӱҥалтыш класслаште тунеммыж годым лудмаш урокышто йоча газет дене палыме лийын. Визымше классышке вончымекыже, подпискым ыштен. Мастарлыкшым сылнымут кружокышто таптен. Тудым З.П.Петрова ден А.А.Сапаев вуйлатеныт.
– Икымше сылнымут саскам «Ковам деке унала» почеламут лийын. Шочмо вер, пӱртӱс нерген корныла-влак утларак шочыныт. «Ямде лий» газетыште савыкталтмылан гонорарым тӱленыт. Кажне гана ты окса дене книгам налынам. Лудаш моткоч йӧратенам. 1995 ийыште редакцийышке класс дене унала пуренна. Ты вашлиймаш деч вара корныштак заметкым возенна, – шарналта туныктышо.
Н.И.Яковлева сылнымут пашаже-влакым посна папкылаште арала. Чонжылан эн лишыллан да шергылан «Школыш коштмо жап» альбомым шотла. Тушко «Ямде лий» газетыште савыкталтше почеламут ден ойлымашыже-влакым чумырен. Тудым моторын сӧрастарен.Газет дене пеҥгыде кылым кучымыжо кызыт туныктымо пашаштыже пеш кӱлешан. Йоча-влакым чын сераш, весын возымыжым тӱткын лудын лончылаш, кусараш туныкта. Тунемшыже-шамыч тӱрлӧ сочинений ден проект конкурслаште сеҥышыш лектыт.
– «Ямде лий» газет, сапкандырам тӧр, чын шупшылын, илышыште кӱлешан айдеме лияш йӧным ыштен. Шкемым туныктышо семын веле огыл, журналист семынат вияҥаш таратен. Тачат чон гыч лекшым, лудшылан келшышым возем, – кугешнен ойла Наталья Ивановна.
