-
«Улына чолга шӱдыр — мурена, куштена», —
тыгай шомакла йоҥгеныт «Изи шӱдыр» регион-влак кокласе йоча усталык конкурсын чапмурыштыжо. 11 октябрьыште И.С.Палантай лӱмеш тӱвыра да сымыктыш колледжын Калыкле сымыктыш гимназийже шке омсажым республикысе эн талантан ӱдыр-рвезе-шамычлан почын. Йоча-влак мурымаште да куштымаште усталыкыштым ончыктеныт.
Теве Йошкар-Оласе «Воштончыш» образцовый музыкально-драматичекий театр пеленысе «Изи Воштончыш» театрыш коштшо 4 ияш Александра Куклина сценыш икымше гана лектын. Тудым да вес ньога-шамычым кугурак ийготан ӱдыр-рвезе-влак, кидпӱан гыч кучен, «Теве тылат пурла кид» эрвелмарий куштымашке ушеныт. Александралан чылажат у да палыдыме гын, «Муро» номинацийыште таҥасыше Полина Щеголева йӧн лийме годым тыгай конкурсышто мастарлыкшым тергашак тырша.
– Мый йочасадыш коштмем годымак мураш кумылаҥынам. Кызыт Марий Турек посёлкысо «Заря» тӱвыра пӧртысӧ «Рябинушка» ансамбль пеленысе йоча ушемыш коштам. Конкурсышто «Самырык ме улына» мурым йоҥгалтаренам. Вуйлатышем Александр Геннадьевич Якимовлан таҥасымашлан ямдылымыжлан тауштем, – ойла ӱдыр.
Полина Марий Турек кыдалаш школышто тунемеш. Чолга юнкорна улеш. Шке ийготан-влак коклаште кумшо верым сеҥен налын.
Конкурс онлайн йӧн денат эртаралтын. Кужэҥер район Кугу Лаждӱр тӱҥалтыш школышто 3-шо классыште тунемше Дарья Глушкова «Вокал. Соло» номинацийыште шке ийготан-влак коклаште икымше верыш лектын.
– Даша йочасадыш коштмыж годымак мураш тӱҥалын. Ачажат – «Лӱҥгалтыш» ансамбльын чолга еҥже. «Изи шӱдыр» конкурслан «Айста пырля лийына» мурым ойыренна. Кажне кечын урок деч вара ямдылалтынна. Семмастар Анатолий Иванович Михеев кугу полышым пуэн, – палдара ӱдырым конкурслан ямдылыше, Кугу Лаждӱр школышто музык предметым туныктышо Алевтина Геннадьевна Чайкина.
Шотыш налза!
Конкурсым Марий Элын калык артистше Нина Макарова, Марий Элын сулло артистше Алина Егошина, музыкант, артист, дизайнер Дмитрий Погадаев акленыт. Мероприятий мучашлалтмеке, вуйлатыше-влак дене вашлиймашым эртареныт, ой-каҥашым пуэныт. Темлымашыштым шо-тыш налза.
* Йоча костюм. Сеҥымаш 50 процентлан костюм деч шога. Сценыш лекше йочалан лач ош тувырым веле огыл, вес тӱсанымат чикташ лиеш. Концертыш толшо еҥ икшывым ончен куанышаш.
* Шыргыжаш туныктыман. Икшыве устан мура, талын кушта, но тыгодым шӱлыкан гын, тыгай койыш сеҥымашлан чаракым ышта. Муро шӱлыкан гынат, утыждене йокрокланен, шортшо гай мураш келшен ок тол.
* Муро мо нерген? Ӱдыр-рвезе-влак мо нерген да кӧлан мурымыштым палышаш улыт. Мурын содержанийжым радамлыман.
Оля МАЙКОВА.
Авторын фотожо.
