Озаҥысе кугыжаныш тӱвыра институтышто «Этномириада» тӱвыра да калык художественный усталык тӱнямбал фестиваль-конкурс латкокымшо гана эртаралтын. Тушко Россий, Белоруссий, Казахстан, Узбекистан, Грузий гыч кум тӱжем утла участник ушнен.
Таҥасымаште Морко йоча сы-мыктыш школын «Кумыл» куштшо ансамбльже икымше степенян лауреат лийын.
– Коллективна самырык. Тыгай кугу конкурсышко икымше гана ушненна. Сеҥымашлан ӱдыр-влак моткоч йывыртеныт, – ойла ансамбль вуйлатыше Светлана Валериановна Панина.
Морко йоча сымыктыш школ гыч фестиваль-конкурсыш ушнышо эше кок коллектив: «Калинка» ден «Морко памаш» куштышо образцовый ансамбль-влак – кокымшо степенян лауреат лӱмым сеҥен налын.
Оля МОШКИНА.
Фотом ансамбльын архивше гыч налме.
