«Марий Элын рӱдолаштыже марла мутланыше йочам вашлияш лиеш мо? Кызыт ялыштат рушла кутыраш тыршат». Тыгай ойым пытартыш жапыште шуко колаш логалын. «Улыт, да шагал огыл. Шочмо йылмым тунемаш кумылаҥден моштыман», – тыге ойла Йошкар-Оласе 10-шо номеран школышто марий йылме да ИКН предметлам туныктышо Л.В.Егошина. Уста туныктышо, ты школыш Йошкар-Оласе Н.К.Крупская лӱмеш марий пединститутым тунем пытарымеке, 1997 ийыште пашаш толын, да ынде 26 ий йӧратыме сомылжым шукта.
– Лариса Валентиновна, туныктымо паша тыланда мо дене лишыл?
– Ты профессийым школышто тунеммем годым ойыренам. 1990 ийыште Кужэҥер школ пелен педагогике класс почылтын. Мый тушто кок ий шинчымашым погенам. Школым тунем пытарымеке, ончыкылык профессийым ойырымо шотышто йодыш лектын огыл. Пашаш толмеке умыленам, туныктышо тиде профессий огыл, чоным куандарыше, вийым пуышо, у пашалан кумылаҥдыше сомыл, призваний. Йоча дене вашкылым пеҥгыдемдымаш, пагалымашым сулымаш туныктышын пашаштыже эн кӱлешан, шонем.
– Оласе йоча-влак марий йылмым кумылын тунемыт?
– Ӱдыр-рвезе-влак койыш-шоктыш дене тӱрлӧ улыт гынат, марий йылмым тыршен тунемыт. Йоча дене мутланен, шке могырышко савырен, тунемаш кумылаҥден моштыман. Тачысе кечын туныктышо гына лийме шагал, нунылан пример, йолташ лийман, илыш дене тӧр ошкылман. Кызыт тидлан шуко йӧн уло: компьютерым кучылтына, проектым возена, модмо семын урокым эртарена. Тӱрлӧ конкурсыш ушнена.
– Школышто марий мероприятийым чӱчкыдын эртареда?
– Марий талешке кечылан сӱрет, презентаций конкурслам кажне ийын эртарена. Тиште кечылан пӧлеклалтше «Марла чын возена» тӱшка диктантыш ий еда ушнена. Республикысе тӱрлӧ конкурсышто йоча-влак мастарлыкыштым ончыктат. «Колумб лудмаш» оласе сылнымут конкурсышто Илья Инородцев ден Дарина Николаева тений сеҥышыш лектыныт. Шукерте огыл эртаралтше «Колумб лудмаш» регион-влак кокласе сылнымут пайремыште коктынат кумшо верым налыныт. Тунемше-влакын сеҥымашышт ончыкыжымат тыршен пашам ышташ кумылаҥда.
– Тау. Паша лектышда тӱвыргӧ саскан лийже.
