Пушкыдо, кужу мамык пунан пырысым кӧ огеш йӧрате? Йоча веле огыл, кугыеҥат тудым, ниялтен, оҥ пеленже ӧндалеш. Ныл йолан «мундыра» – йочанат, кугыеҥынат йолташыже. Южо еҥ йӱдшӧ-кечыже жапым пырля эртара, малашат пеленже пышта. Пырыс-влак молан айдеме пелен малаш йӧратат? Тиде сай але уда койыш? Йошкар-Оласе «Томас» ветеринар клиникысе ветеринар врач, грумер Нина Валерияновна Васильева нине да моло йодыш-влаклан вашмутым муаш полша.
– Пырыс-влак, чынжымак, айдеме пелен малаш йӧратат. Тыге нуно озам йӧратымыштым, шке кӱлешлыкыштым ончыктат. Южылан тамле пуш, озан пушкыдо малымверже келшат. Но пырысым йӧратеда гынат, воктене малаш туныктыман огыл. Пырысын пунжо айдемылан ласкан шӱлашыже мешая. Кокырыктен, тӱрвынчыктен кертеш. Аллергий чер дене орланыше-влаклан утларак лӱдыкшӧ.
– Пырыс тӱрлӧ черым шаркала, южыжо айдеме декат кусна, маныт. Чынак мо?
– Пырысым черым шаркалыше манаш ом тошт. Кажне оза ныл йолан йолташыжым арун кучаш тырша. Озадыме пырыс-влак «уремын санитарже» улыт: колям, куголям пытарат. Нуно гын гельминтозым, дермантофитийым, лишайым шаркален кертыт. Черлын койшо пырыс-влак деч шекланыман, но лӱдман огыл. Нунылан полшыман, пукшыман.
