Морко посёлкысо тӱвыра полат пеленысе «Рвезылык» куштышо кадлык ансамбльым Марий Элыште веле огыл, моло кундемыштат палат. Тавалтен колтат гын, кӱвар чытыже веле. Ансамбль пелен тыгаяк чолга ӱдыр-рвезе-влакым «Самырык тукым» спутникыште ямдылат. Тушто йоча-шамыч кушташ веле огыл тунемыт, марий калыкын историйжым шымлат. Куштымаш гоч калык-влакын койышыштым почын ончыктат. Чыла тидлан А.В.Якушев туныкта.
– Тений гыч посна ансамбль семын пашам ыштена. Тышке кушташ йӧратыше 6-13 ияш латкуд ӱдыр-рвезе коштеш, – ойла Александр Валерьевич. – Изи ошкыл дене у сеҥымашыш шуына. Нуным ончен, моло йоча-шамычынат кушташ кумылышт лектеш, манын шонем.
«Самырык тукым» ансамбльын куштымыжым эскерен, чынжымак, пырля тавалташ лекме шуэш. Ух, кертыт вет! Тывырдык дене кажне еҥын кумылжым савырат. Нуно нӧргӧ улыт гынат, сеҥымашышт ятыр.
Суздаль олаште эртаралтше «Танцуй и пой, Россия молодая» всероссийский конкурсышто Гран-прим сеҥен налыныт, Озаҥ оласе «Ветер перемен» тӱнямбал конкурсышто «Калык куштымаш» таҥасыште I ден II степенян лауреат лийыныт. «Михаил Мурашко йолташыже-влакым ӱжеш» тӱнямбал конкурс-фестивальыште II степенян диплом дене палемдалтыныт.
