Татарстан Республик Пестречинский район Новое Шигалеево селасе Шуко профилян лицей пелен «Весела ното-влак» уста вокал коллектив уло. Тушто тӱрлӧкалык гыч лекше икшыве-влак мастарлыкым погат: руш, татар, марий, корей, эстон. Ансамбль самырык. Мураш йӧратыше-влакым З.А.Яббарова ик коллективыш ныл ий ончыч чумырен. Тунам ӱдыр-рвезе-шамыч верысе йочасадыш коштыныт. Изи гынат, пеш чулым улыт. Моштымашыштым ятыр конкурсышто тергат да чӱчкыдын сеҥыше радамыш лектыт. Москошто, Калининградыште, Санкт-Петербургышто лийыныт. Мый падыраш-влак дене Йошкар-Оласе И.С.Палантай лӱмеш тӱвыра да сымыктыш колледжын Калыкле сымыктыш гимназийыштыже эртаралтше «Ший памаш» регион-влак кокласе фестиваль-конкурсышто палыме лийынам (снимкыште). Агытан нерген мурым йоҥгалтарымышт годым сценыште шкеныштым чылт артист семын кученыт. Шкешотан сценкым ончыктеныт. Икымше верым сеҥен налыныт.
– Ӱдыр-рвезе-влак тыршен тунемыт, репетицийыш куанен коштыт. Репертуарыштына икмыняр йылме дене муро уло. Тыге йоча-шамыч вес калыкын йылмыжым тунемыт, тӱвыражым шымлат. Концертлан чийыме тувырысо тӱрлан тӱткышым ойырат. Кызыт икшыве-влак дене Китайысе Пекин олаште эртаралтше конкурсыш каяш ямдылалтына. «С чего начинается Родина?» мурым рушла, татарла да китайла мураш тӱҥалына, – палдарыш Зарина Айдаровна.
«Весела ното-влак» ансамбльлан умбакыжат сай лектышыш шуаш тыланена. Тек мастарлыкдам вес элыштат кӱкшын аклат.
Оля МАЙКОВА.
Авторын фотожо.
