Кеҥежым ялыште могай сай! Шокшо кече, пеледыш пуш дене варналтше яндар юж, леве вӱд… Чылажат чон ден капым куандараш ӱжеш. Но ял калыкын канен кияш жапше уке. Шудым солыман, пакчаште вӱдым шавыман. Паша лыҥак.
Ик кеҥеж умыр кастене ача-авана, чӱчӱ-чӱчӱньына-влак олыкыш шудо солаш кайышт. Мемнам, йоча-влакым, суртым оролаш кодышт. Пашамат пуаш ышт мондо. Кастене вольыкым пуртышна. Ынде ушкалым лӱшташ кӱлеш. Кузе? Акана-влак вӱташке ошкыльыч, почешышт меат шӱдырнышна. Теве Галя акай водарым мушко, ӱйым йыгалтыш да лӱшташ тӱҥале. Но мо тыгай? Дочка ушкалнан верыштыже йӧршын шогымыжо ок шу. Галя акай тыгеат тӧчыш, тугеат тӧчыш – шот ыш лек. Кенета ала-кӧ шарналтыш: вет чӱчӱньына ушкалым лӱштымӧ годым мурым мура! Тугеже ушкал муро почеш гына шӧрым волта. Акана шкетын ынеже муро, а мураш кӱлеш. Тунам Света акана дирижёр лие. Теве кидшым кӱш нӧлтале – мыланна сигнал. Кидшым лупшалмеке, ме мурышаш улына. Тиде кастене «Калинка-малинка» гыч тӱҥалын «В лесу родилась ёлочка» марте шуна. Ушкалат шыпланыш: мурым пеш колыштеш. Тыгай пиал чыла ушкаллан ок логал!
Вара куаныше кумыл дене модаш куржна. Модмо гутлаште Саша изамын вуйышкыжо ала-мо толын пурыш: ӱпшым пешак тӱредыктынеже. Витне, кечеш чот ырен. Ала-кушеч ургызын вашкӱзыжым муын луктат, акана-влак почеш эй куржтале! Чылт киш ден меж гай пижын. Нунышт ӱпым пӱчкаш ышт кӧнӧ. Тунам Саша изай шкежак вуйжым лоткален нале. Тышеч-тушеч пӱчкедыме дене вуйжо кызыт гына тӱредме шорык гай коеш.
Олык гыч кугурак-влак тольыч. Ушкал лӱштымылан моктышт. Изамын у причёскыжым ужычат, элнен каен воштыльыч. Тиде кастене тудо ӱп деч посна кодо. Чылт глобус.
Тылеч вара шуко жап эртен, чылажат шарнымашеш кодын. Южгунам ушыш пура да мӧҥгеш йоча жапыш пӧртылмӧ шуэш.
Е.А.НЕЧАЕВА.
Параньга, Кугу Пумарий ялысе «Пеледыш» йочасад.
