Вячеслав КОЛЬЦОВ, «Марий Эл» ГТРК радиослужбым вуйлатыше:
– «Ямде лий» газет дене Морко район Шордӱр школышто визымше классыште тунеммем годым пеҥгыде кылым кучаш тӱҥалынам. Школыштына тунам шыма шинчаончалтышан тыматле ӱдыръеҥ Нина Валерьяновна Суслова пашам ыштен. Тудын нерген «Мемнан вожатыйна» заметкым возенам да «Ямде лий» газетыш колтенам. Савыкталтын. Эх, куаненам вет! Уло школ лудын. Вара ик заметке почеш весым серенам, эреак савыктеныт. Тунам газетыш Вячеслав Абукаев, Геннадий Сабанцев, Галина Егорова-Шкалина чолган возеныт. Шарнем, почтальонко Галина акам ял вуйышкак вашлияш арня еда лектынам.
«Ямде лий» газет журналист корным ойыраш кумылаҥден. Алексей Михайлович Юзыкайнлан, Валентин Борисович Исенековлан, Анна Ивановна Петуховалан кугу таум ойлем. «Ямде лийым» кызытат куанен лудам. Журналистше-влак дене кугешнем.
