Йӧратыме «Ямде лий» газетна, тылатат ынде – 90 ий?! Ӱшанымылат ок чуч. Тышеч мыняр ийже пеленем улат? Школышто тунемме годым юнкор лийынам, студент годым почеламутем дене редакцийышке куржталынам. Паша корныш шогалмеке, вучымо авторет лийынам, а кум ийжым (1988-1991 ийла) помыштет редактор семын вияҥынам.
Йоча годым тый кугу тӱняшке ончалаш полшышо тӧрза, айдеме семын куштышо поро туныктышо гай лийынат. Тыяк марий сылнымутым йӧратен шындыктенат, ӧрмалгыше рвезым уло-уке усталык вийжылан ӱшанаш таратенат. Тыге шӱдӧ дене марий серыше ойлен кертеш.
Редактор лийын, пашам ыштыме жапат огеш мондалт. Ме редакцийын пашаче ешыж дене йӧратыме газетнан але марте шуктымо йӱлажым, сеҥымашыжым пеҥгыдемден, умбакыже шуяш тыршенна. «Ямде лий» газетна, кызытат тыйын йыр, палем, мӱкшиге-влакын мӱкшава йыр чумыргымышт семынак чумыргат. Тек тыге лиеш ончыкыжат!
Ик курымаш лӱмгечетымат вашлияш, марий манмыла, Юмо тазалыкым пуыжо. Пайремет дене саламлем!
Геннадий САБАНЦЕВ-ОЯР, Марий Эл Республикын калык поэтше.
