Пытартыш ийлаште «Точка роста» рӱдерым районысо ятыр школышто почыныт. Звенигово район Чакмарий школышто 2021 ий сентябрь гыч ныл программе дене пашам ыштат. Иктыже – 10-11-ше класслаште тунемше-влаклан «Экологий лабораторий». Тудым биологийым да географийым туныктышо Т.Н.Дмитриева (снимкыште – йоча-влак дене пырля) вуйлата.
– Ӱдыр-рвезе-влак пӱртӱсым изинек йӧратыше кушкыт. Нунылан шочмо кундемысе кушкыл, шукш-копшаҥге, янлык-влакын илышышт оҥай. Микроскоп гоч ончаш поснак йӧратат, ум пален налаш кумылышт уло. Тидым урокышто ши-жынам да икшыве-шамычым кружокыш чумыренам. «Точка роста» почылтмеке, у арвер-шамыч пашанам саемдаш полшат, – ойла Татьяна Николаевна.
Тунемше-шамыч пӱртӱсым эскерыме гоч шымлыме пашалан кумылаҥыт. Чакмарий кундемысе йырвелым, урок да каныме годым йӱк-йӱанын кугытшым (уровень шума), кислород ден углекислый газын мыняр улмыштым, вӱдын яндарлыкшым шымленыт. Иктешлымеке, тидлан пӧлеклалтше проект пашам возеныт. Мутлан, Дарья Петрова «Пчела – друг человека» пашам серен, Виктория Захарова – «Влияние звука и шума на здоровье человека» да ятыр молат.
