Татарстан Республик Набережные Челны олаште шуко тӱрлӧ калык келшен, икте-весым умылен ила. Нунын коклаште – кум тӱжем наре марий еҥ. Марий-влакын общиныштат уло. Кодшо курымын индешлымше ийлаж гыч «Марий сем» ансамбль пашам ышта. Варарак Марий рушарня школым почыныт. Тудым эн ончыч Л.В.Шабалин, вара Т.П.Закирова вуйлатеныт. 2014 ий гыч школ вес лӱмым налын – марий йылмым, тӱвырам, йӱлам йӧратыше-влакын «Эрвий» клубышт. Марий шӱлышан икшыве-шамычым шке йырже Е.А.Селезнёва чумырен.
– «Эрвийыш» ныл-латкандаш ияш ӱдыр-рвезе-влак коштыт. Нунын коклаште шке икшывем-шамыч улыт. Ме «Родник» келшымаш пӧртыштӧ кажне изарня да рушарня еда погынена. Кугу олаште тӱрлӧ калык дене келшен илена гынат, кӧ улмынам мондышаш огынал. Садлан, кызытсе илышлан келшыше йӧн-влакым кучылтын, йоча-шамычым марий тӱвыра, йӱла дене палдарена, марий йылмым тунемына. Марий классик серызе-шамычын сылнымутыштым шергалына, почеламутым тунемына. Занятийлаште калык мо-дыш дене модына, мурена, куштена. Марий пайрем-влакым тӱшкан пайремлена, – ойла Евгения Анатольевна.
«Эрвий» клубын участникше-шамыч мастарлыкыштым оласе, республикысе мероприятий ден фестивальлаште тергат. Верысе «Марий сем» ансамбль дене пеҥгыде кылым кучат. Нунын дене пырля «Мы ветви древа одного», «Доброе богатство – лучшее богатство» фестивальлаште усталыкыштым ончыктеныт.
– Чылажат еш гыч тӱҥалеш. Йоча-влак мемнам ончен кушкыт. Садлан марий йылмын, тӱвыран акыштым умылаш изинек туныктыман, – ойла клуб вуйлатыше.
