9-11-ше класслаште тунемше-влакын тургым пагытышт лишемеш. Вашке ОГЭ ден ЕГЭ-м сдатлаш тӱҥалыт. Тидын шотышто Психолого-педагогический да калыклан социал полышым пуышо «Доверие» рӱдерын психолог-педагогшо Татьяна Соловьёва шкешотан «рецептым» пуа.
Экзаменлан кузе ямдылалташ?
1.Йоча да ача-ава-влак умылышаш улыт: экзамен акырсаман огыл. Тудым кажне тунемше кучен кертеш.
2.Ача-ава-влак «Тый кертат», «Мый тыланет ӱшанем» шомак-влак дене икшывым лыпландарышаш улыт.
3.Экзаменлан ямдылалтмаш мӧҥгысӧ пашам ыштыме гаяк. Яндар южышто коштман, жапыштыже кочман, сайын малыман.
4.Материалым зубритлыман огыл, умылен тунемман. Чот тургыжланыме (стресс) годым уло-уке шинчымаш уш гыч иканаште «ӱштылалт» кертеш. Садлан чыла умылен тунемман.
5.Иканаште шуко тунемман огыл, ужашын-ужашын тунемат гын, кужу жаплан шарналт кодеш.
Экзамен деч ончычсо тургыжланымашым кораҥдаш полшышо «Улак вер» упражнений
Шинча ончылныда чонланда келшыше, канаш келыштарыме улак верым (изи пєрт, ола тӱрысӧ пачер, космический корабль да молат) сӱретлыза. Тиде верыш те гына корным паледа. Тушто могай арвер-влак улыт, шке семында ойлыза. Ала мурым колыштыда, ала каминысе тулыш ончеда, ала лудыда, ала сӱретледа? Экзамен годымат тиде упражненийым ышташ лиеш. Те парт коклаште огыл, улак верыште улыда манын шоныман.
