«Шке тукымвожым сайын палыман», – тыгай шонымаш дене ешнан историйжым шымлаш тӱҥалынам. Тыге кугезе ковам Хадия Хайрулловна Хайруллина нерген кумданрак пален налынам. Тудо 1922 ий 10 майыште Татарстан кундем Дубъязский район Сая ялеш шочын. Шым классым тунем пытарен. Верысе колхозышто, тӱвыра пӧртыштӧ пашам ыштен. 1942 ийыште армийыш налыныт. Тудо Икымше Украин фронтын 122-шо медико-санитарный батальонышкыжо логалын. Тӱжем наре сусыргышым эмлен. Украина, Польша верч кредалын.
Шочмо кундемыш пӧртылмекыже, кевытыште ужалышылан ятыр жап пашам ыштен. Вара Морко район Красный Стекловар посёлкыш толын. Тыге мемнан тукым Марий Элыште илаш тӱҥалын.
Кугезе ковамын «Отличник санитарной службы» знакшым, «За боевые заслуги» медальжым, Жуковын медальжым, II степенян Кугу Ачамланде сар орденжым кызытат аралена. Мый ковам дене моткоч кугешнем.
Иван ПЕТКЕЕВ.
Йошкар-Ола, 17-ше номеран школ.
Фотом еш архив
