Марий тӱвыра рӱдер «Йӱштӧ Кугызалан серыш» республикысе конкурсым иктешлен. 6-9 ияш-влак коклаште Оршанке район Кугунур школышто тунемше Савва Уткин сеҥышыш лектын. 2-шо номеран Морко школ гыч Алина Субботина 10-12 ияш-влак коклаште ойыртемалтын. 13-15 ияш-влак коклаште Марий Турек район Арбор школ гыч Амалия Зыкина икымше вер дене палемдалтын. Тудын серышыж гыч ужашым лудаш темлена.
«Поро лийже, Йӱштӧ Кугыза. Мый школышко куанен коштам. Тушто ӱшанле йолташем ден пагалыме туныктышем-влак вучат. Мыйын ачам уке. Илыш дене чеверласымыж годым ик ияш гына лийынам. Южгунам фотокартычкыжым ончемат, шинчавӱдем лектеш.
Йӱштӧ Кочай, шкемым идалык мучко сайын кученам. Авамлан, акамлан, изамлан, кочамлан пашам ышташ полшенам, «нылытан» да «визытан» отметкылан веле тунемаш тыршенам. Кугыеҥ-влакын мутыштым колыштынам, изиракым чаманенам. Пӧлек шотышто шуко жап шонкаленам. Мыйын чылажат уло: ӱстембалне тутло кочкыш, уремыш чиен лекташ сӧрал вургем. Школышто лӱдде тунемаш, уремыште модын куржталаш, ече дене кошташ лиеш. Сар кайыме верыште тыгай огыл…
Кочай, тый чыла кертат! Юзо тоят дене тӱкалтет гын, кож йыли-юли волгалтеш. Украиныште шучко сар вашкерак чарныже, тӱнямбалне эре тыныслык лийже ыле. Ик йочат шужен да кылмен ынже кошт. Школыштына ик-шыве верч тургыжланыше вуйлатыше да туныктышо-влак пашам ыштат. Ӱдыр-рвезе-шамыч марла яндарын кутырат. Ме у школым вучена. Шонымашнам шуктет манын, моткоч ӱшанена».
