Икымше гана парт коклашке шичме пагытым нигунам мондаш ок лий. Тыгодым йочан илышыштыже у йыжыҥ тӱҥалеш. Тиде татым мыят порын шарнем. Моткоч тургыжланенам гынат, кумылем нӧлтшӧ лийын. Тыгай шижмашым икымше туныктышем ылыжтен моштен. Поро шинчаончалтышан, ныжылге койыш-шоктышан туныктышо шокшо шомак дене мемнам вашлийын. Тиде Надежда Геннадьевна Никифорова (снимкыште).
Ныл ий жапыште мемнам шке икшывыж семын пагален, йӧратен. Туддеч кеч-кунам полышым, каҥашым йодаш лийын. Мемнан сеҥымашлан пырля йывыртен, нелылыкым иквереш эрташ полшен. Каникул жапыште тӱрлӧ вере экскурсий дене коштыктен. Надежда Геннадьевна мемнам эре ончыкылык илышлан ямдылен. Икте-весе дене келшаш, полшаш, шкем арун кучаш туныктен. Кызыт визымше классыште тунемам. Н.Г.Никифорован каҥашыжым ӱмыр мучко шарнаш тӱҥалам. Илыш корнышто ятыр туныктышо вашлиялтеш. Но икымше туныктышо поснак шерге да пагалыме.
Полина ВАСИЛЬЕВА.
Волжский, Пӧтъял школ пеленысе Йоча усталык пӧрт.
Фотом еш архив гыч налме
