«Ой, книга, книга! Чылажымат тый кертат…» Марий сылнымутлан негызым пыштыше С.Г.Чавайн тыге арам огыл возен. Книга уш-акылым пойдара, тӱняумылымашым кумдаҥда, шонаш тарата, кунамже чонымат лыпландара. «ВКонтакте» соцкылыште «Марла лудына» марафон кумшо гана эртаралтын. Тушко изижат-кугужат ушненыт. Теве Башкортостан Республик Балтач район Ӱлыл Йыванай школышто 5-ше классыште тунемше-влак марий книгам классыште тӱшкан лудыныт (снимкыште). Нуным директорын воспитаний паша шотышто совет никше Н.А.Беляева кумылаҥден.
– Тений школыштына шаймуратовский классым почынна. Тыгайже мемнан республикыште веле уло. Ты класс Россий Федерацийын геройжо, генерал-майор Минигали Шаймуратовын лӱмжым нумалеш. Ты классыште тунемше-шамычым Шочмо элым йӧраташ, кеч-могай аланыште чолга лияш, элын тӱвыражым, йӱлажым, эртыме корныжым палаш да пагалаш утларак туныктена, сарзе паша дене палдарена. 5-ше классыш коштшо ӱдыр-рвезе-влак чолга, марий шӱлышан улыт. Мый марий книгам изинек лудын кушкынам. Йоча-шамычымат марий произ веденийлан шӱмаҥдыман манын, марафоныш ушнаш кумылаҥденам. Икмыняр произведенийым темленам. Йоча-шамыч Никандр Лекайнын «Кӱртньӧ вий» романжым ойыреныт. Икымше кечын шке лудынам, вара книгам черет дене шергалаш тӱҥалынна. Тыге кажне кечын урок деч вара ик жаплан сылнымут тӱняшке кусненна, – ойла Надежда Аркадьевна.
Йоча-влаклан ожнысо илыш нерген лудаш пеш келшен, шкенышт дене таҥастареныт, лончыленыт. Икте-весе коклаштышт диалект шомакым кучылт мутланат гын, сылнымутан произведенийым лудын, марла яндарынрак кутыраш тунемыт, йылмыштым лывыртат.
Ӱдыр-рвезе-влак марафоныш тӱшкан ушнымышт дене ойыртемалтыныт. Нунылан «Ямде лий» газет деч пӧлек – электрон подписке.
Христина АЛЕКСАНДРОВА.
Фотом школ архив гыч налме.
