Кӧ калыкын, тукымын, еҥын эртыме корныжым шымла, тудо шочмо кундемжым пагала да акла. Республикысе марий тӱвыра рӱдер «Ший талешке» шымлыме краеведений паша конференцийым лач тыгаяк шонымаш дене ий еда эртара. Тений тудо луымшо гана лийын да просветитель, фольклорист, этнограф, туныктышо Тихон Ефремовын шочмыжлан 115 ий теммылан пӧлеклалтын. 12 майыште Морко район Унчо селасе тӱвыра пӧртыштӧ калык лыҥ погынен. Волжский, Марий Турек, Морко, Кужэҥер, Медведево районла, Йошкар-Ола, Татарстан кундем гыч ӱдыр-рвезе-влак уста туныктышо, вуйлатыше, школ нерген шымлыме пашашт дене палдареныт. Украиныште эртаралтше спецоперацийыште Шочмо элым аралыше салтак, иза, ача-влак нерген кугешнен, шинчавӱд йӧре каласкаленыт. Пашаштым «Туныктышо – наставник да йолташ», «Герой землякна-влак» таҥаслаште аклымашке луктыныт. 37 ӱдыр-рвезе деч 32 паша пурен.
Волжский район Упшер школын тунемшыже Даша Фадеева «Уста туныктышо, школ вуйлатыше» пашаж дене Гран-прим сеҥен налын. Тудо туныктышо да вуйлатыше В.А.Аникин нерген палдарен.
– «Кугу букван» туныктышо-шамычлан самырык тукым поснак тӱткышым ойырышаш. Тыге шарнымаш курымешлан кодеш, шонем. Василий Аникич нерген шымлыме пашам возаш туныктышем Надежда Борисовна Степанова темлен. Эн ончыч школ архивлан эҥертенам. Уныкаже, тунемшыже-влак дене вашлийын кутыренам, фото-влакым погенам. Василий Аникич нылле ийым туныктымо пашалан пуэн. Мый тудын дене кугешнем, – ойла Даша.
«Туныктышо – наставник да йолташ» таҥасыште 11-14 ийготан-влак коклаште Кужэҥер район Шӱдымарий школ гыч Даша Родионова сеҥышыш лектын. Диплом ден кубокым Республикысе марий тӱвыра рӱдерын вуйлатышыже, Марий Эл Кугыжаныш погынын депутатше Н.В.Пушкина, В.М.Васильев лӱмеш Йылмым, сылнымутым да историйым шымлыше марий шанче институтын вуйлатышыже Л.Я.Григорьева кучыктеныт.
15-18 ияш-влак коклаште И.С.Палантай лӱмеш тӱвыра да сымыктыш колледжын Национальный сымыктыш гимназийын тунемшыже Полина Бирюкова ойыртемалтын. Ты школынак тунемшыже Даша Юрьева «Герой землякна-влак» таҥасыште икымше лийын. 11-14 ияш-влак коклаште Марий Турек районысо С.Р.Суворов лӱмеш Сысоево школ гыч Александра Орлова сеҥышыш лектын.
