15 майыште Морко районышто марий серызе, журналист, Марий Эл Республикысе тўвыран сулло пашаеҥже Ю.П.Русановын шочмыжлан 55 ий темме лўмеш ятыр мероприятий эртаралтын. Тушко Юрий Петровичын родо-тукымжо, йолташыже, пырля пашам ыштыше, тунемше ден туныктышо-влак погыненыт. Йошкар-Ола гыч толшо уна-шамыч эн ончыч Немычсола шўгарлашке пуреныт, чолга меръеҥым порын шарналтеныт. Умбакыже корно серызын шочмо Нурўмбал ялышкыже шуйнен. Тушто Ю.Русановын кресаваже, пошкудыжо-влак шочмо сурт ончылныжо шокшын вашлийыныт. Вара Зеленогорск школышто шарныктыш оҥа ончыкыжо пеледышым пыштеныт.
Поэтын сылнымутшым йєратыше-шамыч «Айдеме чон – кавасе шўдыр» районысо поэзий конкурсышко ушненыт. Тунемше-влак коклаште 1-ше номеран Морко школ гыч Анна Яковлева сеҥышыш лектын. Кожлаер школын тунемшыже Дарья Бочкарёва кокымшо лийын, Унчо школ гыч Александр Фёдоров – кумшо. Нуным снимкыште ужыда. Сеҥыше ден участник-влаклан чапле пєлекым кучыктеныт. Конкурс деч вара сылнымут да театр мастер-класслаште мастарлыкыштым вияҥденыт.
