«Шочмо марий йылме мыйын илышыштем кугу верым налеш. Шарнем, икана конкурслан Макс Майнын марий йылме нерген почеламутшым тунемынам. Почеламут корныла-влак чонышкем келгын шыҥеныт. Тунам марий йылмын шерге улмыжым эшеат чот шижынам», – ойла эрвелмарий ӱдыр Вероника Ижбулатова (снимкыште).
Вероника – Башкортостан Республик Калтаса район Ӱлыл Качмаш ялын шочшыжо. Кызыт 2-шо номеран Калтаса кыдалаш школышто 10-шо классыште тунемеш.
– Мый изинек тӱрлӧ конкурсыш ушнаш йӧратем, – ойла Вероника. – Таҥасымашлаште да олимпиадылаште вием тергем. Чӱчкыдын ончыл верыш лектам. А кунам сеҥет, вес гана эшеат чот тыршаш кумылаҥат. Уш-акылем пойдараш манын, книгам шуко лудам. Тиде сомылым ик эн кӱлешанлан да пайдалылан шотлем.
Марий шӱлыш – Вероникан вӱрыштыжак. Тудо верысе тӱвыра пӧрт пеленысе «Ош пеледыш» ансамбльын ик эн чолга участницыже. Тушко икымше класс гыч коштеш. Ансамбльым С.П.Семёнова вуйлата. Марий калык куштымашым тунемыт. Кызытсе хореографийымат ӧрдыжеш огыт кодо. Коллектив дене яллаште концертым ончыктат. Тений кеҥежым Йошкар-Олаште эртаралтше «Пеледыш пайремыш» ушненыт.
– Марий мландыште мемнам кинде-шинчал дене вашлийыныт. Тунам мый умыленам: марий калык кеч-куштат эн чолга, эн весела да унам ончен моштышо, – куанже дене палдара ӱдыр. – Марий Элын рӱдолаже моторлыкшо дене ӧрыктарыш. Тудо кажне марий еҥын чон каныме верже.
Фотом еш архив гыч налме.
