Модшо-влак: кува ден кугыза, Агытан, Пий, Рывыж.
Сценым сӧрастараш кӱлеш: курчак театрын ширмыже, модыш-влак, чодыра, тумо, пӧрт сӱрет-шамыч.
Вӱдышӧ: Иленыт улмаш кува ден кугыза. Нуно Пий ден Агытаным шужыктен ашненыт. Эсогыл шкаланыштат кочкашышт пыкше ситареныт.
Агытан: Пий изай, тыге шуженат колаш лиеш. Айда чодыраш илаш каена. Мый пушеҥге кичкым чӱҥгем, тый лум йымалне иктаж-мом верештат.
Вӱдышӧ: Кутырен келшен, эрлашыжым корныш тарванат. Кува эрдене кудывечыш лектеш – ик йӱкат ок шокто.
Кува: Ой, ачаже, паша пытыш. Ны Агытанна, ны Пийна уке улыт.
Кугыза: Ит ойгыро, садак торашкак каен огытыл, жап эртымеке пӧртылыт.
Вӱдышӧ: Пий ден Агытан чодыраш миен шуыт.
Агытан: Толашыже толынна, мемнам йомдарат вет?!
Пий: Туге шол. Чодыраште илашыжат куштылго огыл.
Агытан: Ит ойгыро, ме пырля улына, мемнам нимо ок лӱдыктӧ.
Вӱдышӧ: Пычкемышалтеш. Кок йолташ кугу тумо дек миен шуэш. Агытан пушеҥге укшыш кӱзен шинчеш, пий мундырала пӱтырналт возеш.
Агытан: Ке-ке-рек-кре-е-е-к!
Вӱдышӧ: Агытанын мурымыжым тора гыч колын, Рывыж кудал мия.
Рывыж: Ой, Агытан-Агытан, муретше пеш сылне! Яндар йӱкет дене кеч-могай пайремым сӧрастарен кертат. Айда мый декем унала каена. Мый тыйым пырче дене сийлен колтем.
Пий: Э-э, чоя Рывыж, Агытан йолташемым руалтынет?!
Вӱдышӧ: Пий содор тӧрштен лектеш да Рывыжым нерже гыч пурлын поктен колта. Шкеже Агытанлан тыге ойла.
Пий: Тетла тыге ит муро. Йӱкетым колын, моло ян-лыкат толын кертыт.
Агытан: Чодыраште чынак лӱдыкшӧ улмаш. Пий тос, айда лучо мӧҥгӧ каена. Адакшым тыште мыланна кочкышым кӧ ямдыла?
Пий: Э-э, иже умылышыч?! Вет шкеак чодырашке куштылго илышым кычалын каяш ӱжыч! Пашам ыштыде, мӱшкырет нигунам ок тем. Паша пукша, паша йӱкта, паша илаш туныкта.
Вӱдышӧ: Агытан ден Пий мӧҥгӧ пӧртылыт. Кува ден кугыза куанымышт дене шортынат колтат. Суртыштышт илыш утыр веселаҥеш.
Т.С.ДАНИЛОВА.
Параньга, Матародо.
Снимкыште: Т.С.Данилова – йоча-влак дене пырля.
