Самырык тукымын чон арулыкшым шочмо йылме, сылнымут полшымо дене аралаш, шинчымашым кумдаҥдаш, возымо усталыкым вияҥдаш йӧным ыштыме шонымаш дене «Рвезе йӱк» сылнымут конкурс ий еда эртаралтеш. Марий Элын калык писательже В.А.Абукаев-Эмгак лӱмеш «Ший памаш» поро кумылым ончыктымо сылнымут фонд тудым эртараш полша. Тений «Рвезе йӱк» конкурсым М.Шкетан лӱмеш Марий драме театрыште иктешленна. Ий мучко ойыртемалтын возышо юнкор-влакым лауреат лӱм дене палемденна. Чолга ӱдыр-влаклан кубок ден пӧлекым «Ший памаш» сылнымут фондын вуйлатышыже В.В.Краснов да «Ямде лий» газетын тӱҥ редакторжо Л.Н.Григорьева кучыктеныт.
Журналистын тӱрлӧ жанрже дене чолган возымыжлан «Ямде лий» газетын икымше редакторжо Зинаида Емельяновна Яковлева лӱмеш премий дене Советский район Кельмаксола школын тунемшыже Юлия Ягодарова палемдалтын. Поэзийыште ойыртемалтмылжан Антонов Ивук лӱмеш премийым 1-ше номеран Шернур школын тунемшыже Анна Прохорова налын. Юнкор да сылнымут пашам сайын виктарен колтымылан Валентин Борисович Исенеков лӱмеш премийым Морко район Шӱргыял школын «Марий сылнымут садвечыште» юнкор кружоклан пуымо. Вуйлатышыже – марий йылмым да литературым туныктышо Е.В.Григорьева.
– Шуко вере марий йылмым йот йылме семын тунеммылан чонем коршта. Мый изинек шочмо йылмым йӧратен кушкынам. Пашаш толмеке, марий йылмын ямжым, моторлыкшым, вийжым шижын мошташ йоча-шамычымат кумылаҥденам. Тиде шонымаш денак юнкор кружокым почынам. Тӱҥ темына – шочмо йылме. Ме почеламутым, сочиненийым, кӱчык заметкылам возена. Синквейным гын кажне йоча ыштен ончен. Кружокын лектышышже тунемме ий мучаште сайын палдырна, – ойла Елена Валериановна.
«Почётан юнкор» лӱм дене прозаик, «Ямде лий» газетыште ятыр ий тӱҥ редакторлан пашам ыштыше, кызыт «Марий Эл» газетыште сылнымут йодыш дене редактор, Марий Эл Республикын сулло журналистше Лидия Васильевна Семёнова палемдалтын.
Ший памаш гай яндар, ава шӧр дене чоныш шыҥыше шочмо марий йылмым кузе от йӧрате? «Ямде лий» газет дене пеҥгыде кылым кучышо ӱдыр-рвезе-влак ончыкыжымат ятырын лийыт манын ӱшанена. Кажне ийын эртарыме «Рвезе йӱк» сылнымут конкурсыш тӱрлӧ темылан заметкым, йомакым, ойлымашым, мыскарам, почеламутым вучаш тӱҥалына. Марий Эл деч ӧрдыштӧ илыше йоча-влакынат пашаштым вучена. Ӱдыр-рвезе-влак, те ончыкылыклан ӱшаным пуэда.
