Ача-ава, коча-кова-влакын икшывым шочмо йылмым йӧраташ, тӱвырам пагалаш туныктымышт чонышто куаным да ончыкылыклан волгыдо ӱшаным шочыкта. Вет чылажат еш гыч тӱҥалеш. А кунам сценыште икмыняр тукымын муралтен-чӱчкалтымыжым, тавалтен колтымыжым ужат, йывыртен эскераш да кугешнаш веле кодеш.
Кодшо арнян У Торъял посёлкышто еш-тукым фольклор ансамбль-влакын «Творцы и хранители» регион-влак кокласе фестивальышт шымше гана эртаралтын. Фестивальыш Марий Элысе районла, тыгак Чуваший ден Татарстан республикла гыч 32 еш коллектив ушнен. Конкурс тӱрлӧ номинаций дене эртен: «Эн сай калык кухньо», «Еш династий-влак», «Мемнан еш пушеҥгына» да «Эн сай еш фольклор ансамбль». Участник-влакым диплом дене палемденыт да шарнымашан пӧлекым кучыктеныт.
Параньга район Ондропсола гыч Смирновмыт ешыште кажныже усталык шӱлышан. Сценыш лекше икмыняр тукыман латныл еҥ гыч чылан мурен-куштымо деч посна могай-гынат семӱзгар дене шоктеныт. Теве 8 ияш Элеонора ден 6 ияш Богдан Петровмыт лывыргын тарванылмышт, муралтымышт дене калыкын кумылжым савыреныт. Смирновмыт «Эн сай еш фольклор ансамбль. Исполнительский мастарлык» номинацийыште II степенян дипломым сеҥен налыныт. Тыгак «Мемнан еш пушеҥгына» эн сай фотоончер» таҥасыште III верыш лектыныт. Тек кушкын толшо тукым еш ансамбльым умбакыжат тӱзландара. А еш-тукым фольклор ансамбль-влакын фестивальышт чолга да уста еш-шамычым эше ик гана веле огыл чумыра манын ӱшанена.
