Максим Ирбулдин – Татарстан кундем Кукмара район Изи Курыкӱмбал ялын талантан эргыже. Тений шымше классым тунем пытарен. Мураш-кушташ, семӱзгар дене шокташ кумылан. Семым изиж годымак шижаш тӱҥалын. Ведрам але вес арверым изи тоя дене перкален да шкешотан сем лектын. Жап эртымеке, Максимын музыклан шӱман улмыжым чылан умыленыт.
Куд ияшыж годым рвезе «Кна вел» верысе калык фольклор ансамбльыш ушнен. Ондак тӱмырым перкален. Семӱзгар шкеж деч кугу лийын гынат, тиде чаракым ыштен огыл. Икшывым тунамак районын ик эн сай тӱмырзыжлан шотлаш тӱҥалыныт. Жап эртымеке, Максим мураш кумылаҥын. Ондак марий такмак-шамычым мурен гын, кызыт эстраде мурыламат йоҥгалтара. 5-6-шо класслаште тунеммыж годым шке семынже гармоньым шупшкедаш тӱҥалын. Весела сем-влакым шоктымыж дене ешыжым мурыкта да куштыкта. Южгунам синтезатор ончылно жапым эртара.
Кызыт Уял тӱвыра пӧрт пеленысе «Кна вел» ансамбльым Максимын тукым акаже Ангелина Яковлевна Ирбулдина вуйлата. Тудо изи артистым мураш-кушташ тӱвыра пӧртышто веле огыл, мӧҥгыштыжат туныкта. Максим ятыр конкурсышто чолгалыкшым ончыкта, районысо, республикысе да регион-влак кокласе конкурслаште чӱчкыдын сеҥыше-шамыч радамыш лектеш, лауреат лӱмым сула. Кеч-могай выступленийлан ямдылымыштлан, кугу кӱкшытыш шуаш полшымыштлан А.Я.Ирбулдина ден туныктышыжо М.Х.Шайхутдиновалан таушта. Ангелина Яковлевна рвезым концерт ден мероприятийлаш коштыкташ тырша. Кунамже сценыш пырля лектын муралтен-кушталтат гын, кунамже – посна.
Максим почеламутымат возкала. Шкеак семым келыштараш тырша. Илен-толын, рвезе ала лӱмлӧ мурызо лиеш да калыкым куандараш тӱҥалеш манын ӱшанена.
