Спорт дене изинек кылым кучен кушкат гын, виян капкылан, шуаралтше лият. Тиде шонымашым Звенигово районысо Эсмекпляк школышто нылымше классыште тунемше Данила Лесников раш умыла.
Чыла предмет кокла гыч физкультурым эн чот йӧрата. Писын тарванылаш таратыше модышлам акла. Тыгак футболла модаш кумылан. Школышто эртаралтше тӱрлӧ таҥасымаште вий-куатшым терга. Кажне гана сеҥыше-влак радамыш лектеш. Районысо таҥасымашлаштат писылыкшым да чолгалыкшым ончыкта. Данила греко-римский кучедалмаш дене эртаралтше таҥасымаште вийжым терген да районышто кумшо верым сеҥен налын. Кажне ийын «Российын ечыгорныжо» спорт акцийышке ушна. Тӱҥалтыш классыште тунемеш гынат, ятыр чапкагаз дене палемдалтын.
Данила дене кугешнаш веле кодеш. Умбакыжат сеҥымашыж дене куандараш тӱҥалеш манын, ӱшанена.
А.ДУБОВНИКОВА.
