Йошкар-Олаште эртаралтше «Сылнымут алмаштыш» регион-влак кокласе конкурсын 70 утла участникше кокла гыч шкетын марий тувырым чиен толшо ӱдыр шинчамлан вигак пернен. Тудын дене, газетым лудшо йолташ-влак, тендамат палымым ыштем.
Ангелина Васильева Морко район Коркатово лицейыште нылымше классыште тунемеш, изинек марий шӱлышан кушкеш.
– Марий йылме – шочмо йылмем. Тудо мыйын вӱрыштемак. Марий ешеш шочын-кушкынам, марий тӱвыра да йӱла деке лишыл улам. Ешыште чылан марла мутланена, – ойла ӱдыр.
Ангелина марий йылме ден литературым эн йӧратыме предметше-влаклан шотла. Тений марий йылме дене районысо олимпиадыште кумшо верым сеҥен налын. Кидышкыже книгам чӱчкыдын куча. С.Г.Чавайнын произведенийлажым лудаш йӧрата. Шкежат ойлымашым, йомакым возкалаш кумылан. Пӱртӱс, шочмо ял, школ дене кылдалтше теме-влак лишыл улыт. Элым аралышын кечыжлан пӧлеклалтше «Аралыше мыйын ешыштем» конкурсыш ушнен. СВО-што порысшым шуктышо Станислав изаж нерген возымо пашаж дене республикыште кокымшо верыш лектын. «Сылнымут алмаштыш» конкурсышто йомакшым кӱкшын акленыт да икымше вер дене палемденыт. Ангелинан возымыжо «Ямде лий», «Кугарня» да «Морко мланде» газетлаште савыкталтыт.
В.МАМАЕВА.
С.Архипован фотожо.
