Ӱдыр-влаклан «ZARA» футбол школым Йошкар-Олаште кок ий ончыч почыныт. Тушко 5-17 ияш-влак коштыт. Футбол школым А.В.Запевалова вуйлата. Тудын дене вашлийын мутланышна.
– Александра Викторовна, очыни, те йочада годым шкежат футболла модаш йӧратенда?
– Шуко йоча семынак спортын ты видшылан мый уремыште шӱмаҥынам. 13-14 ияшем годым Советский посёлкысо 3-шо №-ан школын командышкыже ушненам. «Мини-футбол в школу» турнирыште кокымшо верыш лектынна. Тиде мемнан икымше кугу сеҥымашна лийын. А мыйым «Юл кундемын эн сай капка оролжо» лӱм дене палемденыт. Тиддеч вара Марий Эл Республикысе «Мариэлочка» командын тренерже Е.Л.Петров мыйым шкеж декее ӱжын.
– Школым почаш шонымашда кузе шочын?
– Российын спорт мастерже, йоча тренер А.Рахматуллина дене коктын, республикыштына ӱдыр-влаклан футбол школ лийже манын, шукертак шоненна. Тыге йоча-влакым погаш тӱҥалынна. Командым чумыраш куштылгыжак лийын огыл. Кызыт школышко 50 наре йоча коштеш.
– Йоча-влакым футбол школыш мыняр ияш гыч налыда?
– Футбол дене модаш тунемаш кумылан-влакым ий мучко налына. Эн изи футболист-влак 4-5 ияш улыт. Пытартыш жапыште ӱдырамаш-влакат командым погаш йодын толыт. Тидыже куандара, пашалан вийым ешара. Кызыт ме писын вияҥаш тыршена. У тренер-влак пашаш толыт. Марий Эл Республикысе Футбол да регби дене олимпийский резерв спортшкол пелен ӱдыр-влаклан отделенийым почаш кутырен келшенна. Талын модшо 10-11 ияш ӱдыр-влакым тушко колташ тӱҥалына. 14-15 ияш-влак профессионал футбол командыш логалышт манын тыршена.
– Тренировкым кузе да мыняр жап эртареда?
– Физический формым кучаш манын шуко тыршыман, вийым пыштыман. Тунам лектыш лиеш. Ме тренировкым арняште кум гана шагат, шагатат пеле дене эртарена. Кок занятийым модмо техникылан ойырена, кумшо урокышто тудым пеҥгыдемдена. Тӱрлӧ таҥасымашке ушнена. Тений коло утла турнирыште мастарлыкнам ончыктенна.
– Йоча-влаклан могай ой-каҥашым пуэда?
– Спорт дене кылым кучыза. Пеҥгыде тазалык верч лийза, шонымашышкыда шуаш тыршыза. Футбол – тиде команде дене модмаш, пырля модшо йолташда-влакым, тренердам пагалыза. Спорт дене кылым кучышо айдеме личность семын вияҥеш.
Е.ИВАНОВА мутланен.
