Йошкар-Олаште эртаралтше «Пеледыш пайрем» всероссийский фестивальыште тӱрлӧ кундем гыч толшо марий-влак чылт пеледышла койыныт. Пеледыш-влак коклаште марий тувырым чийыше, кидыш гармоньым кучышо рвезе шинчашкем пернен.
Тиде Виче кундем Вятские Поляны ола гыч Саша Ананьев. Йӧратыме семӱзгарже дене кум-ныл ияш улмыж годымак шокташ тӱҥалын. Тудлан изи гармоньым лӱмын налын пуэныт.
– Ешыште мурылан чылан кумылан улына. Ачам Сергей Евгеньевич гармонь дене устан шокта. Авам Лариса Анатольевна «Туймо мари» ансамбльыш коштеш. Кызыт мый гармонист Виктор Алексеевич Филиппов деч шукылан тунемам. Мыланем гармоньын сылне йӱкшак келша, – ойла уста рвезе.
Саша утларакше шке кундемысе такмак-влакым шокта. Ончыкыжым усталыкшым вияҥдаш да марий калыклан куаным пӧлеклаш шона.
