Ме чыланат кешырым палена. Тудым тӱрлӧ тамле кочкышым ямдылыме годым кучылтына. Кажне шошым йыраҥыш кичкым ӱдена да шыжым вожсаскам поген налына. Кешырым ныл тӱжем ий ончыч ончен кушташ тӱҥалыныт. Российысе калык тиде пакчасаска нерген XVI курым гыч пала. Ир кешырын вожсаскаже тӱрлӧ тӱсан лийын гын, кызытсе гайым Голлан-дийысе селекционер-влак XVII курымышто ойырен луктыныт.
Ир кешыр Марий Элыште кызытат кушкеш. Мый тудым Курыкмарий районысо Цотнай ял воктен верланыше Иоанын курыкыштыжо ужынам. Тиде курык археологий памятниклан шотлалтеш. Ир кешырым кузе палаш лиеш? Пеледышыже ошо, кӱкшытшӧ метр наре лийын кертеш. Шудыжо кешырын гаяк. Вожсаскаже ошалге-нарынче тӱсан, изи.
Владимир МУХИН.
Кужэҥер, Кугу Лаждӱр.
