У Торъял район Овалже ял сылне пӱртӱс лоҥгаште верланен. Тыште кумдан палыме шуко еҥ шочын-кушкын. Иктыже – Совет Ушем Герой М.В.Лебедев. Ме, Кузнеч школ пеленысе «Романтик» лагерьыш коштшо ӱдыр-рвезе-влак, Геройын лӱмжым нумалше Немда школыш, Михаил Васильевич лӱмеш тоштерыш миенна. Лагерь вуйлатыше, М.В.Лебедевын тукым шӱжарже Э.А.Домрачева мемнам порын вашлийын. Марий герой нерген каласкален. Тоштер моткоч поян. Моторын сӧрастарыме пӧлемыште шуко экспонат, шергакан материал улыт. Ме Михаил Васильевичын школ пагытше, илыш корныжо нерген пален налынна. Стендыште улшо карт-влак почеш фронт корныжым онченна, серышыжым лудынна, тунемме табельжым ужынна. Йолташыже-влакын шарнымашышт шӱмеш логалын. Герой мыланна эше лишылрак лийын. Ме тудын дене кугешнена. Немда школышто поян тоштерым чумырышо-влаклан кугу таум ойлена.
Вероника МАМАЕВА.
У Торъял район.
Фотом школ архив гыч налме.
