Йоча-влак, мӧҥгыштыда орхидей кӧршӧк пеледыш уло, очыни. Олыкысо орхидейым паледа? Пальчатокоренник мясо-красный маналтеш. Ты пеледышым Волжский район Ярамарий ял воктенысе олыкышто ужынна. Тудо вӱдыжгырак верыште, ер серыште кушкеш. Ожно ты верыште кӱтӱ коштын, шудым соленыт, садлан пеледыш кушкын кертын огыл. Кызыт олыкышто шып, садлан пальчатокоренник ракатланен пеледеш. Авам дене тынар шуко кушкылым ужмеке, моткоч ӧрынна. Эсогыл шотленна. Изирак кумдыкышто – 835 кушкыл. Пеледышын кӱкшытшымат висенна. Эн кӱкшӧ 61 сантиметран лийын. Пеледышлыкше кугу огыл, но мотор. Садлан шукш-копшаҥге ден еҥ-влак тудым тора гычак ужын кертыт.
Тендан йодышда уло, очыни. Молан тыге маналтеш? Пареҥгыже парням ушештара. Тӱсшӧ свежа шыл гай. Пальчатокоренникын чотшо пошкудо кундемлаште иземеш. Мутлан, Татарстаныште тудым Йошкар книгашке пуртымо. Садлан ме, йоча-влак, кеч-могай кушкылым изинек аралаш тунемшаш улына.
Давид ТИМОФЕЕВ.
Волжск, 2-шо номеран школ.
Олыкысо орхидей
