2023 ийын озажлан кролик шотлалтеш. Пушкыдо пунан мотор янлыкым оласе ӱдыр-рвезе-влак зоопаркышке ончаш я ончерлашке вуйжо гыч ниялташ коштыт гын, ялысе йоча-шамыч тидын шотышто пиалан улыт. Ешлаште тудым шукын ашнат. Теве Советский район Эҥерсола ял гыч Гусевмыт латик ий утла мӧҥгысӧ мераҥ дене йолташ улыт. Нуным кузе пукшаш, эскераш кӱлмым раш палат. Тидын да моло нерген озавате А.Н.Гусева дене мутланышна.
– Алла Николаевна, кроликым шотлаш ок йӧрӧ, да нунылан шинча писын возеш манмым колынам. Тиде чын мо?
– Тиде тыгак. Шочын вочшо иге-влаклан шинча пеш писын возеш. Садлан шке еш дене веле эскерена. Кугу лиймекыштат шотлаш огына тырше.
– Мӧҥгысӧ мераҥын пӱйжӧ ӱмыр мучко кушкеш. Садлан тудым шумаш келшыше кочкышым пукшыман?
– Кроликын кӱшыл пӱйжӧ кажне арнян кок миллиметрлан кушкеш. Мутлан, шудым кочмыж годым тудын оҥылашлужо шолаш-пурлаш, пурлаш-шолаш тарванылеш. Вакшкӱм ушештара. Тыге тудын пӱйжӧ шумалтеш. Ныл йолан йолташна-влаклан ме тыгак кешырым, ковыштам, кормалык ушменым пукшена. Арымшудым пуэна, тудо бактерий деч аралалташ полша. Телылан арама выньыкым ямдылена. Кроликлан шӧрдорыкым, шылым, пурсам, шере кочкышым, пӱкшым пукшаш ок лий. Тидым палыман да шарныман.
– Кроликым клеткыште веле ашнаш лиеш?
– Ме клеткыште аш-нена. Решоткан шартышыш пилашӱкым пыштена. Кочкашышт, йӱашышт пуэна. Ик тылзаш иге-влакым авашт деч ойырена. Кӱчык жаплан вӱташкат колтена. Нуно тарванылшаш улыт.
– Тиде янлык вудыматен, пырысла мырлен мошта, маныт. Те тыгайым шекланенда?
– Кролик-влакын пачала магырымыштым чӱчкыдын колам. Йӱкышт пеш яндар да чарга. Тыгай годым вигак куржын лектам. Изирак рож гыч игышт вес ава дек кая гын, кугу йӱкым луктыт. Шке шочшыштым аралынешт. Пукшымышт годым игышт дене пуйто кутырат, манын ойлат. Но мый нигунам колын омыл. Лишемме йӱкнам колмеке, пукшымым вигак чарнат.
