Куштылго атлетикым йӧратен шынденам. Молан шонеда? Шукерте огыл Шернур район Купран школышто эртаралтше республикысе шыже кроссышто икымше верым сеҥен налынам. Тудо тале спортсмен-влак А.А.Половниковым, И.С.Павловым, Н.Г.Мамаевым шарныме лӱмеш эртаралтын. Мый тыгай сеҥымашке икымше гана шуынам. Мыланем кубокым, грамотым, медальым кучыктеныт. Йолташем-влакат сеҥымашышт дене кугешнат. Ростислав Васинкин икымше лийын. Максим Григорьев ден Росина Васинкина шке таҥашышт-влак коклаште кокымшо верым сеҥен налыныт. Мемнам снимкыште ужыда.
Ульяна ФЁДОРОВА.
Марий Турек, Арбор.
