Шоналташ гын, туныктышо-влак могай уста улыт! Мом гына ыштен огыт мошто?! Келге шинчымашым пуымо деч посна нуно тӱрлат, пидыт, сылнын сӱретлат… Татарстан Республик Агрыз район Буймо школышто марий йылмым да литературым туныктышо Э.Н.Ильина (снимкыште – тунемшыже-влак дене пырля) тӱрлӧ янлыкым, шукш-копшаҥгым да молымат цемент гыч ненча.
– Школ кумдыкым тӱзатыме конкурс тунемме тӧнеж-влак коклаште ий еда эртаралтеш. Кузе да мом ыштыме нерген ятыр жап шоненам. Интернетыште тӱрлӧ видеом ончен, цемент гыч ненчаш писын тунемынам. Конкурсын йодмыж почеш изирак пӱям келыштарыман ыле. Оҥайрак лийже манын, Вӱдонын вуйжым ненченам. Вара ужавам, черепахым вераҥденам, трайым ыштенам. Тораштак огыл рок кокла гыч ончышо сокырголям келыштаренам, – ойла Эмма Николаевна. Тыгай арверым чиялташ акрил чия, ӱмбачынже петыраш лак кӱлыт. Э.Н.Ильина мо улыж дене серлага. Парт, кӱвар чия дене веле чиялта. Садлан кызыт тӱсышт каяш тӱҥалын. Лишыл жапыште уэш сӧрастараш шона. «Тек янлык дек шукш-копшаҥге-влак йоча ден туныктышо-шамычын кумылыштым нӧлтат», – ойла Эмма Николаевна.
Х.АЛЕКСАНДРОВА.
