Марий сылнымутын классикше С.Г.Чавайнын шочмыжлан 135 ий темме лӱмеш республикыште тӱрлӧ сынан мероприятий-влак эртаралтыныт. С.Г.Чавайн лӱмеш Национальный книгагудо «Ото» сылнымут фестивальыш йоча ден кугыеҥ-влакым ушен. Йылмым, литературым да историйым научнын шымлыше В.М.Васильев лӱмеш марий институт «Сергей Чавайн. Личность. Творчество. Эпоха» всероссийский шанче-практике конференцийым эртарен. М.Шкетан лӱмеш Марий национальный драме театр С.Чавайнын «Элнет» романже, «Мӱкш отар» пьесыже почеш шындыме спектакльла дене калыкым куандарен.
Шочмо кундемыште
6 октябрьыште, Сергей Григорьевичын шочмо кечынже, Морко район Чавайнурысо Литератур да этнографий комплексыште район-влак кокласе Чавайн лудмаш кудло наре ӱдыр-рвезым иквереш чумырен. Пайрем С.Чавайнын памятникше воктеке пеледышым пыштымаш гыч тӱҥалын (кӱшыл снимкыште). Торжественный ужашыште шуко уна, Чавайнын уныкаже, кугезе уныкаже-влак марий сылнымутын ачаже нерген кугешнен ойленыт. Морко районысо Унчо школышто тунемше-шамыч С.Чавайнын илыш корныжым мурымаш, куштымаш, почеламут корныла гоч радамленыт. Варажым ӱдыр-рвезе-влак кум секцийыште таҥасеныт: Сергей Григорьевичын почеламутшым, прозыжым лудыныт. Шке гыч возышо йоча-шамыч Чавайн дене кугешнен серыме сылнымутышт дене палдареныт.
Кум йылме дене
– Тений Чавайн лудмашым латиндешымше гана эртаренна. Уста писательын сылнымутшым кум йылме дене, марла, рушла, татарла, лудаш йӧным ыштенна, – ойла Морко районысо М.Н.Янтемир лӱмеш сылнымут да этнографий тоштерым вуйлатыше М.С.Александрова. – Йоча-шамыч ий гыч ийыш моткоч чаплын лудыт. Ындыжым прозымат сылнын лудаш тунемын шуыныт. Тыгай кӱкшытыш шумаште туныктышо, ача-ава-влакын надырышт кугу. Нунылан таум ойлена. Мария Николаевам (Морко, Эҥерсола), Гавриил Александровым (Арын), Регина Григорьевам (2-шо номеран Морко шк.), Ксения Дмитриевам, Ксения Антюшинам (1-ше номеран Морко шк.), Полина Кушаковам (Волжский, Пӧтъял) поснак палемдыме шуэш. Нуно иктаҥашышт-влак коклаште икымше верым сеҥен налыныт. Чавайнын сылнымутшо ий гыч ийыш йоҥга. Самырык тукым тудым шарна да кугешна.
Л.ГРИГОРЬЕВА. А.ТИТОВЫН фотожо-влак.
