Ялысе тӱвыра пӧрт-влак марий йылмым, тӱвырам вияҥдымаште кугу сомылым шуктат. Нунын коклаште Марий Турек район Марий Купто тӱвыра пӧрт поснак ойыртемалтеш. Шукерте огыл тушто «Иле, шочмо йылмем да калыкем» йоча усталык конкурсым эртареныт. Тудын тӱҥ шонымашыж нерген клуб вуйлатыше Г.С.Тихонова палдарен:
– Ты конкурсым эртарымаште Марий Купто школын выпускникше, Россий Федерацийысе Йотэл паша министерствын пашаеҥже Артём Орловын надырже поснак кугу. Всероссийский калык переписьын иктешлымашыжым ужмеке, шке калыкшын ончыкылыкшо верч тургыжланаш тӱҥалын да ты конкурсым эртараш темлен.
Марий Турек, Шернур районласе тӱрлӧ школ, Йошкар-Ола гыч толшо 7-17 ияш ӱдыр-рвезе-влак (снимкыште) почеламутым лудыныт, марий мурым сылнын йоҥгалтареныт. 7-12 ияш-шамыч коклаште Йошкар-Ола гыч Артём Ягодаров сеҥышыш лектын, 13-17 ияш-влак коклаште – рӱдола гыч Арина Ибраева. Икымше верым налшылан кум тӱжем теҥгем кучыктеныт, кокымшылан – тӱжемат пелым, кумшылан – вичшӱдым. Сеҥен налме окса дене ӱдыр-рвезе-влак усталык пашаште шонымашыштым шукташ шонат. Спонсор-шамычын полшымыштлан кӧра кажне участникым кумылаҥдыше пӧлек дене куандареныт.
Конкурсым иктешлымеке, йоча-влак ача-авашт дене пырля «Ӱжара» каныме базыште тошто марий модышла дене модыныт, тӱрлӧ конкурсышто уш-акылыштым да вийыштым тергеныт. Чапле пӧлек ден сувенирым модын налыныт. «Иле, шочмо йылмем да калыкем» йоча усталык конкурсышко вес ийынат участник-влакым вучат.
