Вашке ӱдыр-рвезе-влак уэш парт коклашке шинчыт. Урок ятыр улмылан, мӧҥгысӧ пашам кужу жап ыштымылан, тӱрлӧ конкурслан ямдылалтмылан, проектым серымылан кӧра шуко ӱнар пыта. Тергыме пашам возымо, доска ончык лекме годым тунемше-шамыч тургыжланат. Тыгодым йоча-шамычын тазалыкышт начарешт кертеш: вуйышт, мӱшкырышт коршта, тӱрлӧ лӱдмаш шочеш. Тыге тӱткылык иземеш. Шанчыеҥ-влакын ойлымышт почеш, тунеммаште муро полша. Философ, математик Пифагор мемнан эра деч икымше курым ончычак семын пайдаже, уш-акылым вияҥдымыж нерген ойлен. Мурым кунам да кузе чын колыштман? Могай сем утларак келшен толеш? Нине да моло йодышым Калыклан психологий ден педагогике да социал полышым пуышо «Доверие» республикысе рӱдерын психолог-педагогшо Т.О.СОЛОВЬЁВА рашемдаш полша.
– Муро кеч-могай уверым писын шарнен кодаш полша. Йӧсӧ темым мӧҥгыштӧ пеҥгыдемдынеда гын, ача-аван умылтарымышт годым йӧратыме семым чӱктыман. Тиде мурым кажне гана колыштмо годым ты уверым шарналташ тӱҥалыда. Лирике сынан сылнымут произведенийыште кайык муро да молат улыт гын, пӱртӱс сӱрет дене келшыше мурым чӱктыман. Тыге текстым сайынрак умыледа да тушко чон дене «пуреда». Мутлан, Кугу Ачамланде сар нерген лудмо годым шучко пагытын кочыжым, йӧсыжым шижаш адак келшыше сем полша. Йот йылмым тунемме годым ты йылме дене возымо мурым колышташ пайдале. Тыге кажне шомакым чын ойлаш тунемыда, мом ончыктымыжым шарнен кодыда. Кызытсе мурылаште ятыр йоҥылыш вашлиялтеш. Шинчымашдам тергынеда гын, колыштын, экшыкым кораҥдаш лиеш, – ойла Татьяна Олеговна.
Мурын южо жанрже тунемаш полшымо олмеш чаракым ыштен кертеш. Классике сынан да тӱрлӧ семӱзгар дене шоктымо муро-влак эн келшышылан шотлалтыт. Но семым кугу йӱкын чӱктыман огыл. Металл, рок, хип-хоп, рэп, джаз, блюз жанр-влак икшывылан тӱрлӧ эҥгекым ыштен кертыт.
Йоча-влак, психологын ой-каҥашыжым шотыш налын, мурым тунеммаште пайдалын кучылтса.
