Кужэҥер район Кугу Лаждӱр школ Марий Эл Республикыште эн изи школлан шотлалтеш. ™маште тушто улыжат ныл йоча тунемын. Тений икымше классыш эше ныл йоча толеш. Школ пеленысе йочасадыш 13 икшыве коштеш. Туге гынат илыш шолеш. Туныктышо-влак келге шинчымашым пуат, тунемше-шамыч чолгалыкышт дене ойыртемалтыт. Тиде да моло нерген школ вуйлатыше Р.Г.Глушкова (снимкыште – ӱдыр-рвезе-влак дене пырля) дене мутланышна.
– Римма Геннадьевна, школышто йоча-влакын чотышт иземме мо дене кылдалтын?
– Амал тӱрлӧ лийын кертеш. Тӱҥ амалже – ялыште паша вер уке. Садлан самырык ача-ава-влак олашке илаш каят да тушанак лакемыт.
– Ялысе школышто мо-гай нелылык дене тӱкнаш логалеш?
– Ик йодыш чоным тургыжландара: школнам пу гыч чоҥымо, ынде тоштемын. Чиялтена, тӧрлена, тӱрлӧ семын тыршена. Икмыняр классыште тунемше-влаклан урокым иквереш эртарена. Математике, руш йылме уроклаште веле «ойырлат». Туге гынат у тунемме ийлан школ омсажым у кумыл дене почеш, да сайлан ӱшанена.
– Кугурак школышто йӧн шукырак манын шонен, йоча-влак шочмо школ гыч вес вере куснаш тыршат. Шоналташ гын, изирак школышто келгырак шинчымашым пуат.
– Кажне тунемше – шинча ончылнына. Ме, туныктышо-влак, нуным шке икшывына семынак сайын палена да пагалена. Уроклан кажне кечын ямдылалтыт. Шинчымашышт келге. Тылеч посна шкем ончыкташ чыла йӧн уло. Мемнан дене кажныже – шӱдыр. Нунын деч посна ик мероприятий огеш эртаралт.
– Кугу Лаждӱр школышто кугу сеҥымашке шушо шуко еҥ тунемын. Йоча-влаклан нуно пример улыт.
– Туге. Роза Четкарёва – медицине шанче кандидат, Виталий Иванов – юридический шанче кандидат, профессор, доктор, Геннадий Богданов – ялозанлык шанче кандидат, Александр Петров – Марий Элын калык серызыже, Эрик Петров – «Ончыко» журналын ответственный секретарьже, журналист, Любовь Камалетдинова – Марий Элын сулло журналистше, Анжела Репина – Марий Элысе МВД-н полиций участковый уполномоченныйже да ийготыш шудымо-влак дене паша шотышто пӧлкажым вуйлатышын алмаштышыже, полиций подполковник да ятыр молат. Ӱдыр-рвезе-влак кызытат пеш чолга улыт. Мастарлыкыштым тӱрлӧ конкурсышто тергат.
– Куандара, марий шӱлышым кызытат араледа.
– Кажне туныктышын чоныштыжо марий шӱлыш озалана. Тудым йоча-влак-лан шыҥдарена. Тунемше-шамыч утларакше рушла кутыраш тыршат гынат, мероприятийлам марла эртарена.
– Ий гыч ийыш школда тӱзланыже, йоча-влак ешаралтышт.
