Ты калыкмут дене Оршанке школышто 7-ше «А» классыште тунемше Дарья Бадун (снимкыште) тӱрыснек келша. Тудо имне спортышто шукертсек шуаралтеш да сай лектышым ончыкта.
— 2021 ий мартыште йолташ ӱдырем Йошкар-Ола воктенысе ик имне спортшколыш пырля каяш ӱжын. Тушто имньым ончаш, кушкыжаш туныктеныт. Мыланем пеш келшен. Тиддеч вара имне спорт деке шӱмаҥынам. Кызыт арняште кок гана занятий эртаралтеш. Кажне тренировко куаным конда. Вольык дене вашкылым шижам. Тренерем — тале спортсмен Дарья Александровна Барцева, — ойла Дарья.
Имне спортышто лывырге капкылан, чытыше лийман. Шке вийлан веле огыл, пелен улшо ныл йолан йолташланат ӱшаныман. Лаштыкын геройжо ты спортын выездке йыжыҥыштыже шуаралтеш. Кыртмен тыршымыже сеҥымашке шуаш полша. 2024 да 2025 ийлаште Литти Милтон имне дене Марий Эл Республикын первенствыштыже да чемпионатыштыже чылаштым ончылтен да 9-12 ияш йоча-шамыч коклаште чемпион лийын, кубокым сулен налын. 2026 ийыште таҥасымаште Натса да Ксанта имне-влак дене «Йоча» да «Поним кушкыжшо 9-12 ияш йоча» таҥаслаште ныл шӧртньӧ медальым сеҥен налын. Дарьям Марий Элын командышкыже резерв спискышке пуртеныт.
Пытартыш жапыште ӱдыр у сынан дисциплиныште — конкурышто — шуаралтеш. Ойырымо жапыште, тӱрлӧ чаракым сеҥен, имньым кушкыжын кудалыштман.
— Спортын ты йыжыҥыштыже Деми Мур имне дене вашкылым ышташ тунемына. Тыште ончычсо гай кудалышташ ок лий, имньым йӧршын вес семын вӱдыман. Тудыжо южгунам лӱдеш але йодмым ок шукто. Тыгай годым нелылык лектеш. Таҥасымашке але икмыняр гана веле ушненна гынат, сеҥымашна уло. Ончыкыжымат тыршаш тӱҥалына. Тунемаш кумылан улам. Виче да Моско кундемла гыч кугу кӱкшытыш шушо тренер ден судья-влакын мастер-класслашкышт ушненам, нунын ой-каҥашыштым тӱткын колыштынам да шуко ум пален налынам, — палдара самырык спортсмен.
Дарья икмыняр ий почела кеҥеж каныш годым спортшколышко имньым ончаш полшаш коштеш. 8 шагат эр гыч 6 шагат кас марте жапым вӱташте эртара. Вольык-влакым пӱртӱс лоҥгашке луктеш, пукша, мушкеш, имне кӱчым эрыкта, ӧртньӧрым чикташ да кудашаш полша да ятыр вес сомылым шукта. Школ деч вара ветеринарлан тунемаш пураш шона. Биологийым туныктышо Ирина Аркадьевна Максимова ты предметым келгынрак шымлаш полша.
Оля МАЙКОВА.
Фото-влакым еш архив гыч налме.
