Звенигово район гыч Толстовмыт еш (снимкыште) нерген иктаж уверым колам але лудам гын, шинча ончылнем эн ончыч изи Полина сӱретлалтеш. 2019 ийыште «Изи поҥгызо» конкурсыш ушнымо фотожо тачат ушыштем. Ӱдыр мотор марий тувырым, йыдалым чиен, марий тӱран шовычым пидын. Кидыштыже кугу поҥгым кучен, воктеныже – ошпоҥго дене темше корзиҥга. Ынде ятыр ий эртен. Кызыт Алёна Николаевна ден Михаил Николаевич ныл икшывым ончен куштат.
Кажныже уста
Вате-марий Эҥервож ял гыч улыт. Икте-весыштым изинек палат, ик йочасадыш коштыныт, 7-9-ше класслаште пырля тунемыныт. А 2015 ийыште ешым чумыреныт. Ынде индеш ий икте-весым умылен, пагален илат. Суртоза ик организацийыште машинам вӱдышылан пашам ышта. Озавате ятыр ий воспитатель лийын, кызыт йоча дене шинча.
Эн кугу икшывышт – Полина. Тудо 2-шо номеран Красногорский школышто 3-шо классыште тунемеш. Йоча сымыктыш школышто мастарлыкшым шуара: кушташ, гармонь дене шокташ кумылан. «Изи шӱдыр» ансамбльыште мура. Усталыкшым тӱрлӧ конкурсышто терга. «Мастерская Деда Мороза» районысо конкурсышто икмыняр гана сеҥышыш лектын. «Моя семья. Моя Россия» республикысе сылнын лудмо конкурсышто кумшо лийын. «Подарите нам сказку!», «Любимая французская сказка» республикысе усталык конкурслаште ойыртемалтын. «Самырык тукым» республикысе конкурсын районысо йыжыҥыштыже «Музыкальная» таҥасыште кокымшо верым сеҥен налын. Эше фотоконкурслаште сеҥымашыже ятыр. Артёмлан – куд ий. Тудо Кожласоласе «Теремок» йочасадыш подготовительный группыш коштеш. Гармонь дене шокташ тунемеш, англичан йылмым шымла. Йоча усталык пӧртысӧ «Штрих» кружокышто сӱретлен моштымо мастарлыкшым вияҥда. Ик эн кугу сеҥымашыжлан «Счастливое детство» районысо конкурсышто «Фотография» таҥасыште Гран-прим налмыжым шотла. Кумшо икшыве, Настя, кок ияш. Тыгак йочасадыш куанен вашка. Акаже, изаже семынак усталык шӱлышан кушкеш: кушта, шке семынже мураш тырша. Эн изи падыраш – ик ияш Александра. Тӱням шымла, у моштымашыж дене ача-аважым кечын куандара.
– Йоча-влаклан ӱшанле эҥертыш улына. Нунын поро, оҥай шонымашыштым илышыш шыҥдараш полшена. Изинек сурт сомылкам ышташ туныктена. Пашам йӧратымылан кӧра гына айдеме кугу кӱкшытыш шуын кертеш манын шонена, – ойлат ача-ава.
Эре пырля
Толстовмыт конкурслашке еш денат ушнат. Полинан воспитательже Л.Л.Пакалина эреак шӱкалтышым ышта. «Ача-ава дене пырля», «Авам дене пырля» республикысе конкурслаште мастарлыкым тергеныт. «Кросс нации» таҥасымашке, «Чистый берег» акцийышке ушненыт. «Моя семья» республикысе фото да сӱрет конкурсышто икымше верым сеҥен налыныт.
Йӱлам жаплымашат еш гыч тӱҥалеш да тукым гыч тукымыш кусна. Толстовмыт шочмо кечым, тӱрлӧ пайремым еш дене пайремлат. Кажне кастене кечым кузе эртарымышт нерген каласкалат. Оҥай модышла дене тӱшкан модыт. Малаш вочмо деч ончыч йомакым лудыт. Эрдене помыжалтмеке, икте-весылан поро шомакым пӧлеклат. Тыгак яндар южышто лияш йӧратат.
– Еш – тиде изи тӱня, да кумда сандалык. Тудо пӧртын негызше гай. Тыште илыш чоҥалтеш. Ача-ава икшыве-влаклан изи ошкыл дене кугу кӱкшытыш шуаш полшат. Конкурслашке ушнен, икте-весынам утларак умылаш тӱҥалынна, – ойлат Алёна Николаевна ден Михаил Николаевич.
Х.АЛЕКСАНДРОВА.
Фотом еш архив гыч налме.
