Марий Элыште эртыше каныш кечыште «Российын ечыгорныжо-2025» тӱшка таҥасымаш 43-шо гана эртаралтын да спортлан шӱман 10 000 наре еҥым авалтен. Тений тудо Кугу Ачамланде сарыште Сеҥымашлан 80 ий теммылан пӧлеклалтын.
Марий Элыште тӱҥ таҥасымаш Волжск олаште лийын. Ечыгорныш тӱрлӧ ийготан тӱжем наре спортсмен шогалын. Нуно 5, 10 километрыш куржыныт, тыгак еш дене таҥасеныт, 2025 метрыш тӱшка старт лийын.
Йошкар-Ола воктенысе «Корта» тунемме да тренировкым эртарыме базышкат калык погынен (снимкыште). Моло районыштат тӱшка таҥасымаш пайрем шӱлышан лийын. Южо районышто лишыл кечылаште эртарат.
Л.ГРИГОРЬЕВА.
И.РЕЧКИНЫН фотожо.
